ᐃᓅᓯᖓᓂ ᖃᓄᐃᓕᐅᕈᑎᒋᓯᒪᔭᖏᑦ ᐄᕙ ᖃᒪᓂᖅ ᐋᕆᐊᒃ C.M., O.Nu

ᒥᔅ ᐋᕆᐊᒃ ᐃᓅᓯᓕᒫᒥᓂ ᐊᔭᐅᖅᑐᐃᒍᑎᖃᖅᓯᒪᔪᖅ ᓄᓇᕗᒻᒥᒃ ᐃᓄᐃᓪᓗ ᐅᖃᐅᓯᖏᓐᓂᒃ ᐃᓕᖅᑯᓯᖏᓐᓂᓪᓗ. ᐃᖅᑲᓇᐃᔮᒥᒍᑦ ᐃᓕᓴᐃᔨᐅᓪᓗᓂ, ᐱᕙᓪᓕᐊᔪᓕᕆᔨᐅᓪᓗᓂ, ᓇᒻᒥᓂᖃᖅᑎᐅᓪᓗᓂ, ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᓪᓗᓂ, ᓂᕈᐊᖅᑕᐅᓯᒪᓪᓗᓂᓗ, ᓴᖅᑭᔮᖅᑎᑦᓯᒋᐊᖅᓯᒪᔪᖅ ᐊᑐᖅᑕᐅᒋᐊᖃᕐᓂᖓᓂᒃ ᑐᑭᓯᐅᒪᔭᐅᒋᐊᖃᕐᓂᖓᓂᓪᓗ ᐃᓄᒃᑎᑐᑦ.

ᓯᕗᓪᓕᖅᐹᖑᓪᓗᓂ ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᓂᕐᒧᑦ, ᒥᔅ ᐋᕆᐊᒃ ᐃᑲᔪᕐᓂᖃᖅᓯᒪᒻᒥᔪᖅ ᐃᓄᒃᑎᑐᑦ ᐃᖅᑲᓇᐃᔭᕐᕕᓐᓂ ᐅᖃᐅᓯᕆᔭᐅᖁᓪᓗᒍ ᓄᓇᕗᑦ ᒐᕙᒪᒃᑯᖏᓐᓂ ᐊᑐᓕᖁᔨᓚᐅᖅᓯᒪᓪᓗᓂᓗ ᓄᓇᕗᒻᒥ ᒪᓕᒐᓕᐅᖅᑎᓄᑦ ᓯᕗᓪᓕᖅᐹᒥ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᕐᒥᒃ, ᑭᖑᓂᐊᒍᑦ ᑲᔪᓯᑎᑕᐅᓚᐅᖅᓯᒪᔪᖅ ᐱᖁᔭᙳᖅᑐᓂ.

ᒥᔅ ᐋᕆᐊᒃ ᓂᕈᐊᖅᑕᐅᓚᐅᖅᓯᒪᔪᖅ ᓄᓇᕗᒻᒥ ᒪᓕᒐᓕᐅᖅᑎᐅᓂᕐᒧᑦ ᓯᕗᓕᖅᑎᐅᓚᐅᖅᓯᒪᓪᓗᓂᓗ 2008-ᒥᒃ 2013-ᒧᑦ.

ᓄᓇᕗᒻᒥ ᓯᕗᓪᓕᖅᐹᖑᓪᓗᓂ ᐊᕐᓇᐅᓪᓗᓂ ᓯᕗᓕᖅᑎᐅᓚᐅᖅᑐᖅ ᐊᔭᐅᖅᑐᐃᒍᑎᖃᖅᑐᓂᓗ ᓇᓕᒧᒌᑦᑎᑦᓯᓂᕐᒥᒃ ᐊᕐᓇᓂᓪᓗ ᐊᖑᑎᓂᓪᓗ ᓇᓕᒧᒌᑦᑎᑦᓯᓂᕐᒥᒃ, ᒥᔅ ᐋᕆᐊᒃ ᐃᑲᔪᕐᓂᖃᖅᓯᒪᒻᒪᕆᑦᑐᖅ ᓯᕗᒧᒋᐊᖅᑎᑦᓯᓂᕐᒧᑦ ᐊᕐᓇᓂᒃ ᑲᓇᑕᒥ ᓂᕈᐊᖅᑕᐅᓯᒪᔪᓂᒃ. ᓯᕗᓕᖅᑎᐅᓪᓗᓂ, ᓯᕗᓕᓚᐅᕐᒥᔪᖅ ᓴᓇᑐᔪᓂᒃ ᐊᑕᖏᖅᓯᔪᓂᓪᓗ ᐊᔪᖅᓴᓗᐊᖅᑐᓂᒃ ᐱᔪᓐᓃᕐᔫᒥᑎᑦᓯᒐᓱᐊᕐᓂᕐᒧᑦ ᑐᙵᕕᓕᐅᕐᓂᒃᑯᑦ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ, ᓂᕆᔭᑦᓴᖃᑦᓯᐊᖅᑎᑦᓯᓂᕐᒧᑦ, ᐊᑐᐃᓐᓇᖃᖅᑎᑦᓯᒃᑲᓐᓂᓂᕐᒧᓪᓗ ᐃᓪᓗᓂᒃ ᓄᓇᕗᒻᒥ.

ᒥᔅ ᐋᕆᐊᒃ ᐱᔨᑦᓯᕋᖃᑦᑕᖅᓯᒪᔪᖅ ᓄᓇᒥᓂ ᐊᑭᓕᖅᓱᖅᑕᐅᒐᓂ ᐃᑲᔪᖅᐸᑦᑐᓂ ᐊᕐᕌᒍᕋᓴᕐᓂᒃ. ᐃᓕᓴᕆᔭᐅᓪᓗᓂ ᐊᒥᓱᓂᒃ ᐱᓕᕆᐊᖃᖅᓯᒪᓂᖓᓄᑦ, ᐃᓚᒋᔭᐅᓕᓚᐅᖅᑐᖅ ᑲᓇᑕᒥ ᐃᓕᓴᕆᔭᐅᔾᔪᑎᒥᒃ 2018-ᒥ.