ᑲᒥᓯᓇᐅᑉ ᐱᓕᕆᐊᒃᓴᖏᑦ
ᑲᒥᓯᓇ ᐱᓕᕆᐊᒃᓴᖃᖅᐳᖅ ᑯᐃᑉ ᑭᒡᒐᖅᑐᖅᑎᖓ ᑲᓇᑕᐅᑉ ᐊᕕᒃᑐᖅᓯᒪᔭᖏᓐᓄᑦ ᐱᓕᕆᐊᒃᓴᖏᑕ ᐊᔾᔨᐸᓗᑦᑎᐊᖏᓐᓂᒃ.
ᓄᓇᕗᒻᒥ ᐱᓕᕆᐊᒃᓴᖃᖅᐳᑦ ᑕᐃᔭᐅᔪᒥᒃ “ᑭᒡᒐᖅᑐᐃᔨᐅᓪᓗᑎᒃ ᐊᐅᓚᑦᑎᔪᓐᓇᖅᑐᑦ ᑭᒡᒐᖅᑐᖅᑕᒥᓂᒃ” ᑐᑭᖃᖅᖢᓂ ᐃᓱᒻᒥᖅᑐᐃᔩᑦ ᑲᑎᒪᔨᖏᑦ ᐱᔪᓐᓇᕐᓂᖃᖅᖢᑎᒃ ᑭᓯᐊᓂ ᐃᑲᔪᖅᓱᖅᑕᐅᑦᑎᐊᖅᐸᑦ ᐊᒥᓲᓂᖅᓴᓄᑦ ᒪᓕᒐᓕᐅᖅᑎᐅᖃᑕᐅᔪᓄᑦ ᒪᓕᒐᓕᐅᕐᕕᖕᒥ.
ᒐᕙᒪᑐᖃᒃᑯᓐᓂ ᐅᖃᐅᓯᐅᔪᑦ:
ᑲᓇᑕᒥ ᒐᕙᒪᖓ, ᐊᔾᔨᒌᒃᑎᑦᑎᔪᖅ ᐅᑭᐅᖅᑕᖅᑐᒥᐅᑦ ᐃᓄᖏᑦᑕ ᐃᓱᒪᒋᕙᒃᑕᖏᓐᓂᒃ, ᐃᑲᔪᖅᓱᐃᕗᑦ ᐊᓯᔾᔨᖅᐸᓪᓕᐊᓂᐅᔪᒥᒃ ᓴᙱᓂᖓᓂ ᑭᒃᑯᑐᐃᓐᓇᓄᑦ ᒐᕙᒪᒋᔭᐅᔪᒥᒃ ᓄᓇᕘᒥ ᓵᑕᐅᔪᓐᓇᖅᑐᓄᑦ ᐃᓅᖃᑎᒥᖕᓄᑦ.
ᑲᒥᓯᓇᒧᑦ ᐱᓕᕆᐊᒃᓴᓪᓗᐊᑕᖅ ᓇᓗᓇᐃᖅᓯᕙᖕᓂᖅ ᓈᒻᒪᑦᑎᐊᖅᑐᒥᒃ ᒐᕙᒪᑕᖃᐃᓐᓇᕋᓗᐊᕐᒪᖔᑦ ᐊᒻᒪ ᐃᓱᒪᖅᓱᕈᓐᓇᕐᓂᕆᔭᐅᔪᑦ ᐃᓄᖕᓂᒃ ᓴᐳᑎᓯᒪᔭᐅᑦᑎᐊᕐᕋᓗᐊᕐᒪᖔᑕ.
ᓄᓇᕗᒻᒥ ᒪᓕᒐᖅ ᐃᒪᐃᑦᑕᕆᐊᖃᕐᒪᑦ ᑲᒪᓯᓇ ᑎᓕᓯᕙᒡᓗᓂ ᐃᓱᒻᒥᖅᑐᐃᔩᑦ ᑲᑎᒪᔨᖏᓐᓂᒃ ᐊᑐᓕᖁᔭᐅᔪᓂᒃ ᒪᓕᒐᓕᐅᕐᕕᖕᒥ.
ᒫᓐᓇᐅᔪᖅ, ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑏᑦ ᑲᑎᒪᖃᑦᑕᖅᐳᑦ ᐃᓱᒪᓕᐅᕆᔨᐅᕙᒃᖢᑎᒃ ᑭᓇ ᓯᕗᓪᓕᖅᐸᐅᓗᓂ ᒥᓂᔅᑕᐅᓂᐊᕐᒪᖔᑦ (ᓯᕗᓕᐅᖅᑎ) ᐊᒻᒪ ᒥᓂᔅᑕᐅᖃᑎᒌᓂᒃ ᒥᓂᔅᑕᐅᓂᐊᕐᒪᖔᑕ. ᑕᒪᓐᓇ ᓴᖅᑭᑕᐅᓪᓚᑦᑖᖃᑦᑕᖅᐳᖅ ᒪᓕᒐᓕᐅᕐᕕᖕᒥ ᑲᒥᓯᓇᒧᑦ. ᑭᖑᓂᐊᒍᓪᓗ ᓯᕗᓪᓕᖅᐹᑉ ᒥᓂᔅᑕᐅᑉ ᑲᒪᒋᔭᒃᓴᕆᓕᖅᐸᒃᖢᓂᐅᒃ ᐊᑐᓕᖁᔨᓗᓂ ᑲᒥᓯᓇᒧᑦ ᓇᓕᐊᖕᓂᒃ ᐱᓕᕆᐊᒃᓴᖅᑖᕐᓂᐊᕐᒪᖔᑕ ᓇᓕᐊᖕᓄᑦ ᓂᕈᐊᖅᑕᐅᔪᒧᑦ ᒥᓂᔅᑕᒧᑦ.
ᓄᓇᕘᑉ ᒪᓕᒐᖓᓂ ᑲᒥᓯᓇ ᐱᔪᓐᓇᕐᓂᖃᖅᐳᖅ ᒪᓕᒐᓕᐅᕐᕕᖕᒥ ᐊᒡᒍᖅᑐᐃᔨᐅᓂᕐᒥᒃ ᐃᓱᒻᒥᖅᑐᐃᔨᑦ ᑲᑎᒪᔨᖏᓐᓂᒃ ᐅᖃᖃᑎᖃᓚᐅᖅᑎᓪᓗᒍ.
ᑲᒥᓯᓇᐅᑉ ᑭᒡᒐᖅᑐᐃᑦᑎᐊᕐᓗᓂ ᐱᓕᕆᐊᒃᓴᖓ
ᑲᒥᓯᓇ ᐱᔪᓐᓇᐅᑎᒥᒃ ᐊᔪᕈᓐᓃᖅᓴᖃᑦᑕᖅᐳᑦ ᑕᑯᒃᓴᐅᑎᑦᑎᓗᓂ ᓇᓗᓇᐃᒃᑯᑕᐅᓂᕐᒥᓂᒃ ᓄᓇᕘᒧᑦ, ᐃᑲᔪᖅᓱᕐᓗᓂᒋᑦ ᐅᒃᐱᕆᔭᐅᔪᑦ ᐃᓄᖁᑎᖏᑦᑕ ᐊᖏᕈᑎᒋᓯᒪᔭᖏᓐᓄᑦ ᐊᐅᓚᑦᑎᔾᔪᑕᐅᓂᐊᖅᑐᓂᒃ.
ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ ᑭᒡᒐᖅᑐᐃᓂᕐᒥᒍᑦ ᐱᙳᖅᑎᑦᑎᓲᖑᕗᖅ ᑲᓇᑕᓕᒫᒥ ᐊᒻᒪ ᑲᓇᑕᒥ ᐱᔪᒥᒋᔭᐅᔪᓂᒃ ᑲᓇᑕᒥᐅᓕᒫᓂᒃ, ᑲᒥᓯᓇ ᑭᒡᒐᖅᑐᐃᓂᕐᒥᒍᑦ ᐱᙳᖅᑎᑦᑎᕙᒃᖢᓂ ᐃᓄᐃᑦ ᐱᔪᒥᒋᔭᖏᓐᓂᒃ ᓄᓇᕘᒥ. ᑖᒃᑯᓇᙵᓗᒃᑖᖅ ᑯᐃᓐ ᓂᐊᖁᕆᔭᐅᓪᓗᓂ ᓇᓗᓇᐃᒃᑯᑕᕆᔭᐅᕗᖅ ᐊᑕᐅᓯᐅᑎᑦᑎᕙᒃᖢᓂ ᑖᒃᑯᓂᖓ ᐊᕕᒃᑐᖅᓯᒪᔪᑦ ᐱᔪᒥᒋᔭᐅᔪᓄᑦ.
ᑲᒥᓯᓇ “ᓂᐊᖁᕆᔭᐅᕗᖅ ᑲᓇᑕᒥ” ᑭᓯᐊᓂ ᓂᐊᖁᕆᔭᐅᙱᖦᖢᓂ ᒐᕙᒪᒃᑯᓐᓄᑦ”.
ᐱᓕᕆᔪᖃᕆᐊᖃᙱᓚᖅ ᑭᓯᒥ ᑲᒥᓯᓇ ᐅᕕᓂᖕᒥ-ᐊᐅᖕᒥᓪᓗ ᓇᓗᓇᐃᒃᑯᑕᕐᒥᒃ ᓄᓇᕘᒥ, ᑭᒡᒐᖅᑐᐃᓗᓂ ᓄᓇᕘᒥ ᐃᓄᐃᑦ ᐱᔪᒥᒋᔭᖏᓐᓂᒃ.
ᐱᖁᔭᒃᓴᐃᑦ ᐊᓂᒍᖅᑎᑕᐅᓯᒪᔪᑦ ᒪᓕᒐᓕᐅᕐᕕᖕᒥ ᒪᓕᒐᙳᓲᖑᙱᓚᑦ ᑭᓯᐊᓂ ᑲᒥᓯᓇᒧᑦ ᐊᖏᖅᑕᐅᓚᐅᖅᑎᓪᓗᒋᑦ. ᑲᒥᓯᓇ ᐊᖏᓲᖑᕗᖅ ᐱᖁᔭᒃᓴᓄᑦ ᓯᕗᓪᓕᖅᐹᒧᑦ ᒥᓂᔅᑕᒧᑦ (ᓯᕗᓕᖅᑎᒧᑦ) ᐅᖃᐅᔾᔭᐅᓚᐅᖅᑎᓪᓗᒍ
ᑲᒥᓯᓇᐅᑉ ᐱᔪᓐᓇᕐᓂᖃᕐᕕᒋᔭᖏᑦ ᒪᑯᐊᖑᕗᑦ ᑕᒪᕐᒥᒃ ᒪᓕᒐᖅᑎᒎᖓᔪᑦ ᐊᒻᒪ ᐱᐅᓯᕆᔭᐅᔪᑎᒍᑦ ᑲᒪᒋᔭᒃᓴᑦ. ᒪᓕᒐᑎᒎᖓᔪᑦ ᑲᒪᒋᔭᒃᓴᑦ ᒪᑯᐊᖑᕗᑦ ᐊᖏᖅᑎᑕᐅᓂᖏᑦ ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑎᐅᖃᑕᐅᔪᑦ ᐊᒻᒪ ᐃᓱᒻᒥᖅᑐᐃᔩᑦ ᑲᑎᒪᔨᖏᑦ, ᐅᖃᓕᒫᖅᑎᐅᓪᓗᓂ ᐅᖃᓪᓚᒃᑕᐅᔪᒃᓴᓂᒃ ᒪᓕᒐᓕᐅᕐᕕᖕᒥ ᐱᒋᐊᖅᐸᓪᓕᐊᓕᕌᖓᑕ ᑲᑎᒪᔾᔪᑎᖏᓐᓂᒃ ᐊᒻᒪ ᐊᑎᓕᐅᖅᑎᐅᖃᑕᐅᓪᓗᓂ ᑎᑎᖅᑲᓂᒃ ᓲᕐᓗ ᒥᓂᔅᑕᓄᑦ-ᑎᓕᐅᕈᑎᒋᔭᐅᕙᒃᑐᑦ, ᑲᒥᓯᓇᐅᑉ ᐱᔪᓐᓇᐅᑎᖏᑦ, ᒪᓕᒐᖅᑎᒎᖓᔪᑦ ᑎᓕᓯᔾᔪᑏᑦ ᐊᒻᒪ ᓴᒃᑯᑕᐅᔾᔪᑎᖏᑦ ᑲᒥᓯᓇᐅᑉ ᓄᓇᖁᑎᖏᑦ.
ᐱᐅᓯᕆᔭᐅᔪᑎᒍᑦ ᑲᒪᒋᔭᒃᓴᑦ ᒪᑯᐊᖑᕗᑦ ᑲᒥᓯᓇᐅᑉ ᐅᐸᒍᑎᓯᒪᓂᕆᖃᑦᑕᖅᑕᖏᑦ ᐱᓕᕆᓪᓚᑦᑖᖅᑐᓂᒃ ᓴᖅᑭᑦᑎᖃᑦᑕᕐᓂᕐᓗ ᓱᓕᓂᕋᕈᑎᓂᒃ ᒪᓕᒐᖅᑎᒎᖓᙱᑦᑐᓂᒃ ᐃᓕᖅᑯᓯᕆᔭᐅᕙᒃᑐᒃᑯᑦ